Чтения дня

В​озлю́бленнии, а́ще се́рдце на́ше не за́зрит нам, дерзнове́ние и́мамы к Бо́гу, и его́же а́ще про́сим, прие́млем от него́, я́ко за́поведи его́ соблюда́ем и уго́дная пред ним твори́м. И сия́ есть за́поведь его́, да ве́руем во и́мя сы́на его́ Иису́са Христа́ и лю́бим друг дру́га, я́коже дал есть за́поведь нам. И соблюда́яй за́поведи его́ в нем пребыва́ет, и той в нем. И о сем разуме́ем, я́ко пребыва́ет в нас, от Ду́ха, его́же дал есть нам. Возлю́бленнии, не вся́кому ду́ху ве́руйте, но искуша́йте ду́хи, а́ще от Бо́га суть: я́ко мно́зи лжепроро́цы изыдо́ша в мир. О сем познава́йте Ду́ха Бо́жия и ду́ха ле́стча: всяк Дух, и́же испове́дует Иису́са Христа́ во Пло́ти прише́дша, от Бо́га есть: и всяк дух, и́же не испове́дует Иису́са Христа́ во Пло́ти прише́дша, от Бо́га несть: и Сей есть анти́христов, его́же слы́шасте, я́ко гряде́т, и ны́не в ми́ре есть уже́. Вы от Бо́га есте́, ча́дца, и победи́сте тех: я́ко бо́лий есть и́же в вас, не́жели и́же в ми́ре. Они́ от ми́ра суть: Сего́ ра́ди от ми́ра глаго́лют, и мир тех послу́шает. Мы от Бо́га есмы́: и́же зна́ет Бо́га, послу́шает нас, и и́же несть от Бо́га, не послу́шает нас. О сем познава́ем Ду́ха и́стины и ду́ха ле́стча.

И​ а́бие, еще́ ему́ глаго́лющу, прии́де Иу́да, еди́н сый от обоюна́десяте, и с ним наро́д мног со ору́жием и дреко́льми, от архиере́й и кни́жник и ста́рец. Даде́ же предая́й его́ зна́мение им, глаго́ля: его́же а́ще лобжу́, той есть: ими́те его́ и веди́те (его́) сохра́нно. И прише́д, а́бие присту́пль к нему́, глаго́ла (ему́): равви́, равви́. И облобыза́ его́. Они́ же возложи́ша ру́це свои́ на него́ и я́ша его́. Еди́н же не́кто от стоя́щих извле́к нож, уда́ри раба́ архиере́ова и уре́за ему́ у́хо. И отвеща́в Иису́с рече́ им: я́ко на разбо́йника ли изыдо́сте со ору́жием и дреко́льми я́ти мя; по вся дни бех при вас в Це́ркви учя́, и не я́сте мене́: но да сбу́дется Писа́ние. И оста́вльше его́, вси бежа́ша. И еди́н не́кто ю́ноша и́де по нем, оде́ян в плащани́цу по на́гу: и я́ша того́ ю́ношу. Он же оста́вль плащани́цу, наг бежа́ от них. И ведо́ша Иису́са ко архиере́ю: и снидо́шася к нему́ вси архиере́е и кни́жницы и ста́рцы. И Петр издале́ча въслед его́ и́де до внутрь во двор архиере́ов: и бе седя́ со слуга́ми и гре́яся при свещи́. Архиере́е же и весь сонм иска́ху на Иису́са свиде́тельства, да умертвя́т его́: и не обрета́ху. Мно́зи бо лжесвиде́тельствоваху на него́, и ра́вна свиде́тельства не бя́ху. И не́цыи воста́вше лжесвиде́тельствоваху на него́, глаго́люще: я́ко мы слы́шахом его́ глаго́люща, я́ко аз разорю́ Це́рковь сию́ рукотворе́ную и треми́ де́ньми и́ну нерукотворе́ну сози́жду. И ни та́ко ра́вно бе свиде́тельство их. И воста́в архиере́й посреде́, вопроси́ Иису́са, глаго́ля: не отвещава́еши ли ничесо́же; что Си́и на тя свиде́тельствуют; Он же молча́ше и ничто́же отвещава́ше. Па́ки архиере́й вопроси́ его́ и глаго́ла ему́: ты ли еси́ Христо́с, сын благослове́ннаго; Иису́с же рече́: аз есмь: и у́зрите сы́на челове́ческаго одесну́ю седя́ща Си́лы и гряду́ща со о́блаки небе́сными. Архиере́й же растерза́в ри́зы своя́, глаго́ла: что еще́ тре́буем свиде́телей; слы́шасте хулу́: что вам мни́тся; Они́ же вси осуди́ша его́ бы́ти пови́нна сме́рти. И нача́ша не́цыи плюва́ти нань, и прикрыва́ти лице́ его́, и му́чити его́, и глаго́лати ему́: прорцы́. И слуги́ по лани́тома его́ бия́ху. И су́щу петро́ви во дворе́ ни́зу, прии́де еди́на от рабы́нь архиере́овых, и ви́девши Петра́ гре́ющася, воззре́вши на него́, глаго́ла: и ты с Назаряни́ном Иису́сом был еси́. Он же отве́ржеся, глаго́ля: не вем, ниже́ зна́ю, что ты глаго́леши. И изы́де вон на преддво́рие: и але́ктор возгласи́. И рабы́ня ви́девши его́ па́ки, нача́т глаго́лати предстоя́щым, я́ко Сей от них есть. Он же па́ки отмета́шеся. И пома́ле па́ки предстоя́щии глаго́лаху петро́ви: вои́стинну от них еси́: и́бо галиле́анин еси́, и бесе́да твоя́ подо́бится. Он же нача́ роти́тися и кля́тися, я́ко не вем Челове́ка Сего́, его́же вы глаго́лете. И второ́е але́ктор возгласи́. И помяну́ Петр глаго́л, его́же рече́ ему́ Иису́с, я́ко пре́жде да́же пе́тель не возгласи́т двакра́ты, отве́ржешися мене́ трикра́ты. И наче́н пла́кашеся. И а́бие нау́трие сове́т сотвори́ша архиере́е со ста́рцы и кни́жники, и весь сонм, связа́вше Иису́са ведо́ша и преда́ша (его́) Пила́ту.