Чтения дня

Б​ез вся́каго же прекосло́вия ме́ньшее от бо́льшаго благословля́ется. И зде у́бо десяти́ны челове́цы умира́ющии прие́млют: та́мо же свиде́тельствуемый, я́ко жив есть. И да си́це реку́, Авраа́мом и Леви́й, прие́мляй десяти́ны, десяти́ны дал есть: еще́ бо в чре́слех о́тчиих бя́ше, егда́ сре́те его́ Мелхиседе́к. А́ще у́бо соверше́нство леви́тским свяще́нством бы́ло, лю́дие бо на нем взако́нени бы́ша: ка́я еще́ потре́ба по чи́ну мелхиседе́кову ино́му воста́ти свяще́ннику, а не по чи́ну ааро́нову глаго́латися; прелага́ему бо свяще́нству, по ну́жди и зако́ну премене́ние быва́ет. О не́мже бо глаго́лются сия́, коле́ну ино́му причасти́ся, от него́же никто́же приступи́ ко олтарю́: я́ве бо, я́ко от коле́на иу́дова возсия́ Госпо́дь наш, о не́мже коле́не Моисе́й о свяще́нстве ничесо́же глаго́ла. И ли́шше еще́ я́ве есть, я́ко по подо́бию мелхиседе́кову востае́т Свяще́нник ин, и́же не по зако́ну за́поведи плотски́я бысть, но по Си́ле живота́ неразруша́емаго. Свиде́тельствует бо, я́ко ты еси́ Свяще́нник во век по чи́ну мелхиседе́кову.

И​ егда́ испо́лнишася дни́е очище́ния ею́, по зако́ну моисе́ову, вознесо́ста его́ во Иерусали́м, поста́вити его́ пред Го́сподем, я́коже есть пи́сано в зако́не Госпо́дни: я́ко всяк Младе́нец му́жеска по́лу, разверза́я ложесна́, свя́то Го́сподеви нарече́тся: и е́же да́ти же́ртву, по рече́нному в зако́не Госпо́дни, два го́рличища или́ два птенца́ голуби́на. И се, бе Челове́к во Иерусали́ме, ему́же и́мя Симео́н. И Челове́к Сей пра́ведн и благочести́в, ча́я уте́хи Изра́илевы: и Дух бе Свят в нем. И бе ему́ обеща́нно Ду́хом святы́м, не ви́дети сме́рти, пре́жде да́же не ви́дит Христа́ Госпо́дня. И прии́де ду́хом в Це́рковь. И егда́ введо́ста роди́теля отроча́ Иису́са, сотвори́ти и́ма по обы́чаю зако́нному о нем, и той прие́мь его́ на руку́ свое́ю, и благослови́ Бо́га, и рече́: ны́не отпуща́еши раба́ твоего́, влады́ко, по глаго́лю твоему́, с ми́ром: я́ко ви́десте о́чи мои́ спасе́ние твое́, е́же еси́ угото́вал пред лице́м всех люди́й: Свет во открове́ние язы́ком, и сла́ву люди́й твои́х Изра́иля. И бе Ио́сиф и ма́ти его́ чудя́щася о глаго́лемых о нем. И благослови́ я Симео́н, и рече́ к марии́и Ма́тери его́: се, лежи́т Сей на паде́ние и на воста́ние мно́гим во изра́или, и в зна́мение пререка́емо: и тебе́ же само́й ду́шу про́йдет ору́жие: я́ко да откры́ются от мно́гих серде́ц помышле́ния. И бе А́нна проро́чица, дщи фану́илева, от коле́на Аси́рова: сия́ заматоре́вши во днех мно́зех, жи́вши с му́жем седмь лет от де́вства своего́: и та вдова́ я́ко лет о́смьдесят и четы́ре, я́же не отхожда́ше от це́ркве, посто́м и моли́твами служа́щи день и нощь. И та в той час приста́вши испове́дашеся Го́сподеви и глаго́лаше о нем всем ча́ющым избавле́ния во Иерусали́ме. И я́ко сконча́шася вся по зако́ну Госпо́дню, возврати́шася в Галиле́ю, во град свой Назаре́т. Отроча́ же растя́ше и крепля́шеся Ду́хом, исполня́яся прему́дрости: и благода́ть Бо́жия бе на нем.