Чтения дня

И​ Моисе́й у́бо ве́рен бе во всем дому́ его́, я́коже слуга́, во свиде́тельство глаго́латися име́вшым: Христо́с же я́коже сын в дому́ свое́м: его́же дом мы есмы́, а́ще дерзнове́ние и похвалу́ упова́ния да́же до конца́ изве́стно удержи́м. Те́мже, я́коже глаго́лет Дух Святы́й, днесь, а́ще глас его́ услы́шите, не ожесточи́те серде́ц ва́ших, я́коже в прогне́вании, во дни искуше́ния в пусты́ни, иде́же искуси́ша мя отцы́ ва́ши, искуси́ша мя и ви́деша дела́ моя́ четы́редесять лет. Сего́ ра́ди негодова́х Ро́да того́ и рех: при́сно заблужда́ют се́рдцем, ти́и же не позна́ша пути́й мои́х: я́ко кля́хся во гне́ве мое́м, а́ще вни́дут в поко́й мой. Ко́их же негодова́ четы́редесять лет; Не согреши́вших ли, и́хже ко́сти падо́ша в пусты́ни; Кото́рым же кля́лся не вни́ти в поко́ище его́; Я́ве, я́ко проти́вльшымся. И ви́дим, я́ко не возмого́ша вни́ти за неве́рствие.

П​риступи́ша же не́цыи от саддуке́й, глаго́лющии воскре́снию не бы́ти, вопроша́ху его́, глаго́люще: учи́телю, Моисе́й написа́ нам: а́ще кому́ брат у́мрет имы́й жену́, и той безча́ден у́мрет, да брат его́ по́ймет жену́ и возста́вит се́мя бра́ту своему́: седмь у́бо бра́тий бе: и пе́рвый поя́т жену́, у́мре безча́ден: и поя́т вторы́й жену́, и той у́мре безча́ден: и тре́тий поя́т ю: та́кожде же и вси седмь: и не оста́виша чад и умро́ша: по́слежде же всех у́мре и жена́: в воскре́сние у́бо, кото́раго их бу́дет жена́; седмь бо име́ша ю жену́. И отвеща́в рече́ им Иису́с: сы́нове ве́ка Сего́ же́нятся и посяга́ют: а сподо́бльшиися век он улучи́ти и воскре́сние, е́же от ме́ртвых, ни же́нятся, ни посяга́ют: ни умре́ти бо ктому́ мо́гут: ра́вни бо суть а́нгелом и сы́нове суть Бо́жии, воскре́сния сы́нове су́ще: а я́ко востаю́т ме́ртвии, и Моисе́й сказа́ при купине́, я́коже глаго́лет Го́спода Бо́га авраа́мля и Бо́га исаа́кова и Бо́га иа́ковля: Бог же несть ме́ртвых, но живы́х: вси бо тому́ жи́ви суть. Отвеща́вше же не́цыи от кни́жник реко́ша: учи́телю, до́бре рекл еси́. Ктому́ же не сме́яху его́ вопроси́ти ничесо́же. Рече́ же к ним: ка́ко глаго́лют Христа́ сы́на Дави́дова бы́ти; Сам бо Дави́д глаго́лет в кни́зе псало́мстей: рече́ Госпо́дь Го́сподеви моему́: седи́ одесну́ю мене́, до́ндеже положу́ враги́ твоя́ подно́жие нога́ма твои́ма. Дави́д у́бо Го́спода его́ нарица́ет, и ка́ко сын ему́ есть;