Чтения дня

В​озра́довахся же о Го́споде вельми́, я́ко уже́ когда́ воспомяну́сте пещи́ся о мне: поне́же и печа́стеся, но непого́дным вре́менем обдержа́стеся. Не я́ко по ску́дости глаго́лю: аз бо навыко́х, в ни́хже есмь, дово́лен бы́ти: вем и смири́тися, вем и избы́точествовати: во всем и во всех навыко́х, и насыща́тися и алка́ти, и избы́точествовати и лиша́тися. Вся могу́ о укрепля́ющем мя (иису́се) Христе́. Оба́че до́бре сотвори́сте, сприобщи́вшеся печа́ли мое́й. Ве́сте же и вы, филипписи́ане, я́ко в нача́ле благовествова́ния, егда́ изыдо́х от Македо́нии, ни еди́на ми Це́рковь общева́ся в Сло́во дая́ния и прия́тия, то́чию вы еди́ни: я́ко и в Солу́нь и еди́ною и два́щи в тре́бование (мое́) посла́сте ми. Не я́ко ищу́ дая́ния, но ищу́ плода́ мно́жащагося в Сло́во ва́ше. Прия́х же вся и избы́точествую: испо́лнихся, прие́мь от Епафроди́та по́сланная от вас, воню́ благоуха́ния, же́ртву прия́тну, благоуго́дну Бо́гу. Бог же мой да испо́лнит вся́кое тре́бование ва́ше по бога́тству своему́ в сла́ве, о Христе́ иису́се. Бо́гу же и Отцу́ на́шему сла́ва во ве́ки веко́в. Ами́нь. Целу́йте вся́каго Свя́та о Христе́ иису́се. Целу́ют вы су́щая со мно́ю бра́тия. Целу́ют вы святи́и вси, па́че же и́же от ке́сарева до́му. Благода́ть Го́спода На́шего Иису́са Христа́ со все́ми ва́ми. Ами́нь.

М​оля́ше же его́ не́кий от фарисе́й, дабы́ ял с ним: и вшед в дом фарисе́ов, возлеже́. И се, жена́ во гра́де, я́же бе гре́шница, и уве́девши, я́ко возлежи́т во хра́мине фарисе́ове, прине́сши алава́стр ми́ра, и ста́вши при ногу́ его́ созади́, пла́чущися, нача́т умыва́ти но́зе его́ слеза́ми, и власы́ главы́ своея́ отира́ше, и облобыза́ше но́зе его́, и ма́заше ми́ром. Ви́дев же фарисе́й воззва́вый его́, рече́ в себе́, глаго́ля: Сей а́ще бы был Проро́к, ве́дел бы, Кто и какова́ жена́ прикаса́ется ему́: я́ко гре́шница есть. И отвеща́в Иису́с рече́ к нему́: си́моне, и́мам ти не́что рещи́. Он же рече́: учи́телю, рцы. Иису́с же рече́: два должника́ бе́ста заимода́вцу не́коему: еди́н бе до́лжен пятию́сот дина́рий, други́й же пятию́десят: не иму́щема же и́ма возда́ти, обе́ма отда́. Кото́рый у́бо ею́, рцы, па́че возлю́бит его́; Отвеща́в же Си́мон рече́: мню, я́ко ему́же вя́щше отда́. Он же рече́ ему́: пра́во суди́л еси́. И обра́щься к жене́, си́монови рече́: ви́диши ли сию́ жену́; Внидо́х в дом твой, воды́ на но́зе мои́ не дал еси́: сия́ же слеза́ми облия́ ми но́зе и власы́ главы́ своея́ отре́. Лобза́ния ми не дал еси́: сия́ же, отне́лиже внидо́х, не преста́ облобыза́ющи ми но́зе. Ма́слом главы́ моея́ не пома́зал еси́: сия́ же ми́ром пома́за ми но́зе. Его́же ра́ди, глаго́лю ти, отпуща́ются греси́ ея́ мно́зи, я́ко возлюби́ мно́го: а ему́же ма́ло оставля́ется, ме́ньше лю́бит. Рече́ же Ей: отпуща́ются тебе́ греси́. И нача́ша возлежа́щии с ним глаго́лати в себе́: Кто Сей есть, и́же и грехи́ отпуща́ет; Рече́ же к жене́: ве́ра твоя́ спасе́ тя: иди́ в ми́ре.