Чтения дня

Р​уки́ ско́ро не возлага́й ни на кого́же, ниже́ приобща́йся чужы́м грехо́м: себе́ чи́ста соблюда́й. Ктому́ не пий воды́, но ма́ло вина́ прие́мли, стома́ха ра́ди твоего́ и ча́стых твои́х неду́гов. Не́ких (же) Челове́к греси́ предъявле́ни суть, предваря́юще на суд: не́ким же и после́дствуют. Та́кожде и до́брая дела́ предъявле́на суть: и су́щая и́нако, утаи́тися не мо́гут. Ели́цы суть под и́гом раби́, свои́х госпо́дий вся́кия че́сти да сподобля́ют, да и́мя Бо́жие не ху́лится и учени́е. Иму́щии же ве́рных госпо́дий да не нерадя́т о них, поне́же бра́тия суть: но па́че да рабо́тают, зане́ ве́рни суть и возлю́блени, и́же благода́ть восприе́млющии. Сия́ учи́ и моли́. А́ще ли Кто и́нако учи́т и не приступа́ет к здра́вым словесе́м Го́спода На́шего Иису́са Христа́ и уче́нию, е́же по благове́рию, разгорде́ся, ничто́же ве́дый, но неду́гуяй о стяза́ниих и словопре́ниих, от ни́хже быва́ет за́висть, рве́ние, хулы́, непщева́ния лука́ва, бесе́ды злы́я растле́нных челове́ков умо́м и лише́нных и́стины, непщу́ющих приобре́тение бы́ти благоче́стие. Отступа́й от таковы́х. Есть же сниска́ние ве́лие благоче́стие с дово́льством. Ничто́же бо внесо́хом в мир Сей: я́ве, я́ко ниже́ изнести́ что мо́жем. Име́юще же пи́щу и одея́ние, си́ми дово́льни бу́дем. А хотя́щии богати́тися впа́дают в напа́сти и сеть, и в по́хоти мно́ги несмы́сленны и врежда́ющыя, я́же погружа́ют челове́ки во всегуби́тельство и поги́бель: ко́рень бо всем злым сребролю́бие есть, его́же не́цыи жела́юще заблуди́ша от ве́ры, и себе́ пригвозди́ша боле́знем мно́гим. Ты же, о, челове́че Бо́жий, сих бе́гай: гони́ же пра́вду, благоче́стие, ве́ру, любо́вь, терпе́ние, кро́тость:

П​риноша́ху же к нему́ и младе́нцы, да их ко́снется: ви́девше же ученицы́ запрети́ша им. Иису́с же призва́в их, глаго́ла: оста́вите дете́й приходи́ти ко мне и не брани́те им: таковы́х бо есть Ца́рствие Бо́жие: ами́нь бо глаго́лю вам: и́же а́ще не прии́мет Ца́рствия Бо́жия я́ко отроча́, не и́мать вни́ти в не. Ре́ша же слы́шавшии: то Кто мо́жет спасе́н бы́ти; Он же рече́: невозмо́жная у Челове́к возмо́жна суть у Бо́га. Рече́ же Петр: се, мы оста́вихом вся и по тебе́ идо́хом. Он же рече́ им: ами́нь глаго́лю вам, я́ко никто́же есть, и́же оста́вит дом, или́ роди́тели, или́ бра́тию, или́ сестры́, или́ жену́, или́ ча́да, Ца́рствия ра́ди Бо́жия, и́же не прии́мет мно́жицею во вре́мя сие́, и в век гряду́щий живо́т ве́чный.