Чтения дня

П​ре́жде же прише́ствия ве́ры, под зако́ном стрего́ми бе́хом, затворе́ни в хотя́щую ве́ру откры́тися. Те́мже зако́н пе́стун нам бысть во Христа́, да от ве́ры оправди́мся: прише́дшей же ве́ре, уже́ не под пе́стуном есмы́. Вси бо вы сы́нове Бо́жии есте́ ве́рою о Христе́ иису́се: ели́цы бо во Христа́ крести́стеся, во Христа́ облеко́стеся. Несть Иуде́й, ни е́ллин: несть раб, ни свобо́дь: несть му́жеский пол, ни же́нский: вси бо вы еди́но есте́ о Христе́ иису́се. А́ще ли вы Христо́вы, у́бо авраа́мле се́мя есте́, и по обетова́нию насле́дницы. Глаго́лю же: в ели́ко вре́мя насле́дник млад есть, ничи́мже лу́чший есть раба́, госпо́дь сый всех: но под повели́тели и приста́вники есть да́же до наро́ка о́тча. Та́кожде и мы, егда́ бе́хом мла́ди, под стихи́ами бе́хом ми́ра порабоще́ни: Егда́ же прии́де кончи́на ле́та, посла́ Бог сы́на своего́ единоро́днаго, ражда́емаго от жены́, быва́ема под зако́ном, да подзако́нныя иску́пит, да всыновле́ние восприи́мем.

И​ собра́шася апо́столи ко Иису́су и возвести́ша ему́ вся, и ели́ка сотвори́ша, и ели́ка научи́ша. И рече́ им: прииди́те вы са́ми в пу́сто ме́сто еди́ни и почи́йте ма́ло. Бя́ху бо приходя́щии и отходя́щии мно́зи, и ни я́сти им бе когда́. И идо́ша в пу́сто ме́сто корабле́м еди́ни. И ви́деша их иду́щих наро́ди, и позна́ша их мно́зи: и пе́ши от всех градо́в стица́хуся та́мо, и предвари́ша их, и снидо́шася к нему́. И изше́д ви́де Иису́с наро́д мног и милосе́рдова о них, зане́ бя́ху я́ко о́вцы не иму́щыя па́стыря: и нача́т их учи́ти мно́го. И уже́ часу́ мно́гу бы́вшу, присту́пльше к нему́ ученицы́ его́, глаго́лаша, я́ко пу́сто есть ме́сто, и уже́ час мног: отпусти́ их, да ше́дше во окре́стных се́лех и ве́сех ку́пят себе́ хле́бы: не и́мут бо чесо́ я́сти. Он же отвеща́в рече́ им: дади́те им вы я́сти. И глаго́лаша ему́: да ше́дше ку́пим двема́ сто́ма пе́нязь хле́бы и да́мы им я́сти; Он же рече́ им: коли́ко хле́бы и́мате; иди́те и ви́дите. И уве́девше глаго́лаша: пять (хлеб), и две ры́бе. И повеле́ им посади́ти вся на спо́ды на спо́ды на траве́ зелене́. И возлего́ша на ле́хи на ле́хи по сту и по пяти́десят. И прие́мь пять хлеб и две ры́бе, воззре́в на не́бо, благослови́ и преломи́ хле́бы, и дая́ше ученико́м свои́м, да предлага́ют пред ни́ми: и о́бе ры́бе раздели́ всем. И ядо́ша вси и насы́тишася: и взя́ша укру́хи, двана́десяте ко́шя испо́лнь, и от ры́бу. Бя́ше же я́дших хле́бы я́ко пять ты́сящ муже́й. И а́бие пону́ди ученики́ своя́ вни́ти в кора́бль и вари́ти его́ на он пол к Вифсаи́де, до́ндеже сам отпу́стит наро́ды.